పారా స్పోర్ట్స్ అసోసియేషన్ ఆధ్వర్యంలో ఆదివారం రాజీవ్ క్రీడా మైదానంలో పారా జూనియర్, సబ్ జూనియర్ అథ్లెటిక్స్ పోటీలు ఉత్సాహంగా ప్రారంభమయ్యాయి. ఈ పోటీలకు ముఖ్య అతిధిగా హాజరైన పారా స్పోర్ట్స్ అసోసియేషన్ రాష్ట్ర కార్యదర్శి వి. రామస్వామి జెండా ఊపి పోటీలను ప్రారంభించారు. ఈ సందర్బంగా ఆయన మాట్లాడుతూ ఉమ్మడి విజయనగరం జిల్లా నుండి 13 ఏళ్ళ నుండి 18 ఏళ్ళ లోపు పారా క్రీడాకారులు వంద మందికి పైగా ఈ పోటిల్లో పాల్గొవడం శుభపరిణామమని అన్నారు. ప్రధానంగా రన్నింగ్, షాట్ పుట్, లాంగ్ జంప్, హై జంప్, డిస్కస్ త్రో, జావలిన్ త్రో పోటీలు నిర్వహించామని అన్నారు. ఈ పోటిల్లో ప్రతిభ కనబరచిన వారిని రాష్ట్ర స్థాయి పోటీలకు ఎంపిక చేయడం జరుగుతుందని, అందులో అత్యుత్తమ ప్రతిభ కనబరచిన క్రీడాకారులను ఆగష్టు లో హర్యానాలో జరుగనున్న జాతీయ స్థాయి పారా జూనియర్, సబ్ జూనియర్ అథ్లెటిక్స్ ఛాంపియన్ షిప్-2025 కొరకు ఎంపిక చేయడం జరుగుతుందని తెలిపారు. ఈ కార్యక్రమంలో పారా స్పోర్ట్స్ అసోసియేషన్ జిల్లా గౌరవ అధ్యక్షులు కె. దయానంద్, శ్రీకాకుళం అధ్యక్షులు తురెళ్ల రాము, మన్యం జిల్లా అధ్యక్షులు చీమల రాంబాబు, ఇంటర్నేషనల్ మెడలిస్ట్ శివగంగా, పారా నేషనల్ స్విమ్మర్ రవి తదితరులు పాల్గొన్నారు.
